Kuni kecha Alisher Navoiy nomidagi O'zbekiston Milliy kutubxonasida Ozodbek Nazarbekov bilan ijodiy uchrashuv o'tkazildi. Xonandaning muxlislari, san'at ixlosmandlari va ommaviy axborot vositalari vakillari ishtirok etgan uchrashuv doirasida "Ozodbek kuylaganda" deya nomlangan kitob taqdimoti ham o'tkazildi. Ushbu kitobda Ozodbek tomonidan kuylangan, mana bir necha yillardan buyon avlodlar tarbiyasiga ta'sir ko'rsatib kelayotgan, goh yig'latuvchi, goh kuldiruvchi va albatta fikrlashga undovchi ma'noli qo'shiqlarning she'rlari jamlangan. Samimiy suhbat chog'i Ozodbek Nazarbekov muxlislari savollariga ro'yi-rost javob berdi. Yig'ilganlarni jonli ijrodagi qo'shiqlari bilan xursand etdi.